Un partido doutra categoría

Partido doutra categoría o que mañá nos enfronta ao CD Tenerife en A Malata, con motivo da décima xornada da competición de liga en Primeira Federación Versus eLearning. Hai apenas uns meses, ambos conxuntos estaban nunha categoría superior e, neste inicio de campionato, fóronse posicionando como candidatos para, como mínimo, volver loitar por unha praza no fútbol profesional.

Sempre sen perder a perspectiva de que, tal e como insistía o técnico dos ferroláns, Pablo López, non deixan de ser máis que tres puntos en xogo: “as ligas decídense na xornada 39, non na 10. É un partido importante, pero non decisivo”.

Os tinerfeños comezaron a competición de forma fulgurante e mantivéronse invictos durante as seis primeiras xornadas. Dende entón, a súa traxectoria viuse freada por un empate e dúas derrotas, o cal non ensombrece nin un ápice o potencial dun cadro moi compensado e, sobre todo, con gran calidade en todas as súas liñas.

Nas filas ferrolás, Pablo López conta coa única ausencia por lesión de Álex Zalaya, que continúa recuperándose dos problemas musculares no bíceps femoral da súa coxa dereita, os cales o mantiveron afastado dos terreos de xogo nas últimas semanas.

Pola súa banda, o CD Tenerife non poderá contar neste duelo con Marc Mateu e Javi Pérez.