A Clínica Dental Patricia Aneiros volverá estar presente na Malata como patrocinadora do partido que enfrontará este sábado ao Racing Club Ferrol e á SD Ponferradina, correspondente á décima xornada de Primeira Federación.

Con máis de 20 anos de traxectoria en Ferrolterra, a clínica consolidouse como un referente no seu sector e mantén unha estreita vinculación coa comarca. O seu compromiso co Racing dá continuidade a unha relación baseada na confianza e nunha forma de entender o traballo que ambas partes recoñecen como propia.

Así o destacou Ana Quintián, responsable de Marketing do club, ao poñer en valor os puntos en común entre ambas entidades: "Unha das claves desta colaboración é que compartimos a maneira de entender o traballo: desde a proximidade, a confianza, o esforzo diario e as ganas de seguir mellorando. Aspectos importantes tanto no ámbito empresarial como no deportivo, onde o traballo en equipo e a capacidade de evolucionar son fundamentais para seguir avanzando".

Quintián tamén lembrou que "os mellores resultados constrúense con constancia e dedicación", unha idea que conecta o día a día dunha empresa co traballo que esixe a competición.

Pola súa banda, Patricia Aneiros, responsable da firma, expresou a súa satisfacción por dar continuidade ao patrocinio: "É un orgullo renovar o noso patrocinio. A decisión foi moi doada, porque é aquí onde queremos estar".

A responsable da clínica destacou tamén a ilusión que transmite o equipo e a confianza que percibe no proxecto: "Vemos no equipo ilusión, talento e un adestrador que confía no seu equipo". Para Aneiros, esa confianza é unha das claves para medrar, tanto no deporte como no ámbito empresarial. "Cando traballamos xuntos sumamos a nosa alma, as nosas ideas, talento e uns valores comúns polos que paga a pena loitar", sinalou.

O orgullo de pertenza, a defensa duns cores e a vontade de traballar por un obxectivo común son, en palabras de Patricia Aneiros, algúns dos valores que comparte co Racing e que explican a súa decisión de seguir acompañando ao club.

Como protagonista deste partido patrocinado, Clínica Dental Patricia Aneiros contará cunha maior visibilidade en soportes físicos e dixitais, tanto no estadio da Malata como nos canais oficiais do club.