Segundo compromiso consecutivo para o Racing, que mañá sábado, ás 16:30 horas, recibe na Malata ao Barakaldo CF co obxectivo de dar continuidade á vitoria conseguida o pasado domingo ante o Real Unión. O encontro corresponde á cuarta xornada do campionato de liga do Grupo I de Primeira Federación.

A vitoria fronte ao conxunto irundarra permitiu ao Racing estrear o seu casilleiro de vitorias e deixou tamén boas sensacións no xogo ofensivo, despois dun partido no que amosamos maior capacidade para xerar situacións de perigo e atopamos o camiño do gol con maior facilidade. O equipo deberá agora dar continuidade a esa versión e corrixir os aspectos que lle fixeron sufrir no tramo final.

En fronte estará un Barakaldo que chega á Malata despois de conseguir a súa primeira vitoria do campionato. O conxunto vasco impúxose o pasado venres ao CD Extremadura (1-0), despois de ter empatado sen goles ante a Cultural Leonesa e caer posteriormente ante o CD Coria (4-1). O equipo dirixido por Imanol de la Sota suma catro puntos tras as tres primeiras xornadas, uns puntos que lle permiten afrontar o desprazamento a Ferrol con confianza.

Para o técnico racinguista, Javi Vázquez, o encontro supón unha nova oportunidade para seguir construíndo un proxecto no que a intensidade e a verticalidade sexan os seus sinais de identidade. Ao mesmo tempo, o Racing deberá volver amosar a capacidade para xestionar os diferentes momentos do partido, especialmente cando o marcador sexa favorable.

Para o duelo contará coa única baixa de Álvaro Juan, que continúa recuperándose da súa doenza no xeonllo.

O encontro fronte ao Real Unión fixo brotar de novo a química coa bancada da Malata. A vitoria será un bo estímulo para que moitos racinguistas repitan e nos acompañen nesta contenda, na que precisaremos da súa axuda.

Afectacións

Con motivo destes traballos de mellora, conservación e mantemento do Estadio da Malata, decretouse o peche do sector N de Preferencia.

Todos os abonados situados neste sector deberán ocupar provisionalmente a súa localidade no sector K de Preferencia, mantendo o mesmo número de fila e asento que teñen asignado habitualmente.

Dende as 15:30 horas estará aberta a billeteira de incidencias na bancada de Preferencia para resolver calquera problema que poidan ter os nosos abonados co acceso ao estadio.