Raúl Blanco e Etienne Eto'o chegan ao Racing Club Ferrol en momentos diferentes das súas carreiras e despois de traxectorias tamén distintas, pero ambos comparten a convicción de ter elixido o lugar axeitado para seguir medrando e axudar ao equipo a acadar os seus obxectivos. Así o explicaron ambos durante a súa presentación como novos xogadores racinguistas.

No caso de Raúl, a súa incorporación supón o inicio dunha nova etapa nun club que xa coñece. A súa primeira experiencia como racinguista foi breve e produciuse en circunstancias moi diferentes ás actuais, pero o centrocampista recoñece que regresa agora cunha maior madurez. "Nestes dous anos madurei a nivel físico e mental e creo que son mellor xogador que daquela", explicou.

O futbolista non ocultou a súa satisfacción por volver a Ferrol e pola acollida que recibiu desde a súa chegada. "Estou onde quero estar", asegurou Raúl, que afronta esta nova etapa cunha idea clara sobre o seu papel dentro do proxecto: "Estou aquí para medrar e para que o Racing medre". Unha forma de entender o fútbol na que, segundo explicou, os obxectivos colectivos deben estar sempre por diante dos individuais.

Raúl tamén destacou o crecemento que experimentou o Racing como entidade desde a súa primeira etapa no club. "O club deu un paso adiante, non só no cadro de xogadores e no staff técnico, tamén a nivel institucional. Estanse facendo as cousas moi ben", sinalou o xogador, consciente tamén da esixencia que atopará esta tempada nunha Primeira Federación que considera cada vez máis igualada: "Os equipos reforzáronse moito e as diferenzas entre uns e outros son menores".

Para Etienne Eto'o, a chegada a Ferrol representa tamén unha oportunidade para seguir medrando nun entorno no que espera atopar estabilidade e confianza. O dianteiro considera que a experiencia da pasada tempada lle axudou a evolucionar, tanto dentro como fóra do terreo de xogo. "Nos malos momentos é onde un máis medra", afirmou.

O atacante explicou que apostou polo Racing porque considera que é un club punteiro na categoría e un proxecto que está facendo as cousas moi ben. "Eu necesito estabilidade e estar nun sitio onde me queiran e con ilusión", recoñeceu.

No plano futbolístico, Etienne definiuse como un dianteiro centro, aínda que mostrou a súa disposición a ocupar calquera posición que considere necesaria o corpo técnico. "Podo xogar onde o míster considere, pero eu son un 9, un dianteiro centro. Aí é onde podo achegar o meu mellor rendemento", explicou.

O futbolista tamén se referiu ás expectativas que sempre acompañaron o seu apelido e asegurou afrontar esa circunstancia con naturalidade. "Enorgulléceme o meu apelido, pero quero demostrar quen son e, sobre todo, devolver ao club e á afección a súa confianza con goles e esforzo", sinalou.