Integral Motion aposta unha vez máis polo Racing

Independentemente da categoría, independentemente das circunstancias, Integral Motion é desde hai uns anos un dos nosos patrocinadores principais e aliado fiel do proxecto racinguista desde hai cinco tempadas.

O CEO da firma, Manuel Taboada, visitounos esta mañá con motivo da presentación do Partido Patrocinado Integral Motion, que mañá terá lugar con motivo do Racing-Bilbao Athletic. Unha oportunidade para agradecer este apoio incondicional, do que o presidente racinguista, Manuel Ansede, asegurou que "é vital para o desenvolvemento do noso proxecto".

O mandatario, ademais, puxo o acento na importancia que ten para o club "contar con firmas galegas como Integral Motion, coas que compartimos valores e que están perfectamente aliñadas tanto coa nosa forma de entender o deporte como coa nosa aposta polo desenvolvemento da comarca de Ferrolterra".

Manuel Taboada, pola súa banda, recoñeceu o pracer que lle produce poder acompañar ao club nesta etapa, remarcando a importancia do deporte e os vínculos coa comarca. Pero, sobre todo, destacou a súa confianza "no proxecto do Consello de Administración. Estamos seguros de que antes ou despois imos volver ao fútbol profesional".

Como protagonista deste partido patrocinado, a firma terá, entre outras contraprestacións, unha maior visibilidade en soportes físicos e dixitais, tanto no estadio de A Malata como nas redes sociais do club.