Asalto a O Espiñedo

Non se lle deron ben, ata o momento, ao Racing, os derbis galegos esta tempada, unha circunstancia que o equipo que dirixe Pablo López pretende cambiar mañá na súa visita ao CD Arenteiro. O campo de O Espiñedo acollerá, a partir das 16:15 horas, un partido de máxima intensidade no que, despois de dúas derrotas consecutivas, tratará de sumar tres puntos que lle permitan seguir na parte alta da clasificación, pero, sobre todo, reafirmar a súa aposta futbolística.

Será unha tarefa complicada nun campo no que os de O Carballiño aínda non coñecen a derrota e no que sumaron, polo momento, unha vitoria e tres empates. Catro igualadas teñen no seu casilleiro, o que fala dun equipo aguerrido ao que, sobre todo, é difícil gañar. Un equipo traballador e ordenado, que non encaixa moitos goles e ao que só lle falta un pouco de acerto arriba para avanzar na táboa.

Recuperado Álex Zalaya da súa lesión muscular —o defensa xa adestrou con normalidade esta semana—, Pablo López contará con todos os efectivos dispoñibles para o encontro. O técnico, que non se poderá sentar no banco ao cumprir o seu segundo partido de sanción, convocou a todos os seus xogadores para o partido e será xusto antes do inicio da contenda cando realice o descarte.

Afección

Máis de 200 afeccionados racinguistas estarán en O Espiñedo nun desprazamento no que, de novo, quedou de manifesto a ilusión e intensidade coa que a nosa masa social está afrontando esta campaña. O seu alento está garantido e será determinante para sacar adiante a contenda.