Volve o fútbol a A Malata
O domingo comezamos a tempada de Primeira Federación ante o CF Talavera
O fútbol regresa a A Malata da man da Primeira Federación – Liga E-Learning, cuxa tempada arranca mañá domingo, ás 12:00 horas, co enfrontamento ante o CF Talavera de la Reina. Un duelo co que damos inicio a unha campaña ilusionante, na que queremos transformar o descenso de categoría consumado hai uns meses nunha oportunidade para medrar e converternos nun club e un equipo aínda mellores.
O Racing estréase ante a súa afección cun proxecto totalmente renovado: desde a dirección deportiva, pasando polo corpo técnico ao completo, ata o cadro de xogadores. Pablo López, asistido por David Pérez, lidera un grupo no que só permanecen tres futbolistas do curso pasado: Álvaro Giménez, David Carballo e Aitor Gelardo. O resto son caras novas. Ata 19 xogadores debutarán mañá en partido oficial vestindo as cores do Racing Club Ferrol.
Na portería estarán Miquel Parera, César Fernández e Lucas Díaz, última liña de seguridade do conxunto verde. A defensa contará con Migue Leal, Álvaro Mardones e Álvaro Ramón nos laterais, e con Edgar Pujol, Markel Artetxe e Álex Zalaya no centro da zaga. No centro do campo continúan Aitor Gelardo e David Carballo, acompañados este ano por Ander Gorostidi, Álvaro Peña, Azael García e Jairo Noriega. En posicións máis ofensivas estréanse Álvaro Juan, Pascu, Raúl Dacosta e David Concha, mentres que Antón Escobar e Álvaro Giménez ocuparán as posicións de ataque máis adiantadas.
Trátase dun cadro de xogadores en liñas xerais novo, pero con futbolistas experimentados e con traxectoria na categoría, o que achega un equilibrio que debe ser clave para afrontar os obxectivos marcados. O primeiro e máis importante: ser competitivos e volver enganchar ao público de A Malata. Todo isto sen perder de vista a ambición de regresar ao fútbol profesional. Sabemos que non será doado, non só polas esixencias crecentes da Primeira Federación, senón tamén polas dificultades de iniciar practicamente desde cero un proxecto deportivo. Para iso será fundamental a paciencia, o esforzo e a ilusión, piares dun Racing que non quere poñerse teito.
O CF Talavera de la Reina será o noso primeiro rival nesta nova etapa. O conxunto talaverano, que acaba de regresar á categoría, reforzouse con criterio durante o verán e afronta a tempada con ambición. Será, polo tanto, un adversario esixente, coa confianza que lle outorga a positiva dinámica da pasada campaña e ante o que non cabe o máis mínimo erro.
Para este primeiro encontro oficial, Pablo López contará con todos os seus futbolistas. A lista de convocados está formada por:
Miquel Parera, Migue Leal, Edgar Pujol, Markel Artetxe, Jairo Noriega, Aitor Gelardo, Álvaro Juan, Ander Gorostidi, Antón Escobar, Pascu, Raúl Dacosta, César Fernández, Álex Zalaya, Álvaro Ramón, David Concha, Álvaro Giménez, David Carballo, Álvaro Mardones, Álvaro Peña, Azael García e Lucas Díaz.
A Malata, o noso fortín
Os éxitos desta tempada pasan por ser un equipo sólido na casa. A Malata debe volver ser o fortín de sempre e, para logralo, sabemos que contaremos co alento da nosa afección. Os preto de 8.000 abonados cos que xa conta o club demostran que o racinguismo está máis vivo ca nunca.