Un partido de sensacións

Reforzado deportiva e animicamente tras a súa vitoria ante o líder, o CD Tenerife, no Heliodoro Rodríguez López, o Racing volve a A Malata coa convicción de afianzar as súas boas sensacións e resultados na visita do Celta Fortuna ao coliseo ferrolán. O encontro, correspondente á vixésimo quinta xornada da competición de liga en Primeira Federación Versus E-Learning, disputarase ás 19:00 horas.

Un horario non demasiado propicio, pero que desde a entidade confiamos en que non sexa un obstáculo para que A Malata rexistre unha boa entrada e poidamos contar de novo co respaldo dos nosos incondicionais.

A importancia e o atractivo do partido así o propician; non en van o filial celeste, segundo na clasificación, postulouse como un dos equipos máis en forma do campionato, ademais de ser dos que desprega un fútbol máis ofensivo. Cheo de xogadores novos pero de gran calidade, o equipo que dirixe Fredi é, como o Racing experimentou nas súas propias carnes na primeira volta, un conxunto aguerrido que loita ata o final, o que o levou a levantar marcadores adversos en varias ocasións no que vai de tempada.

Tres puntos importantes na loita racinguista por afianzarse en postos de play-off, pero tamén para reforzar sensacións e gañar en “competitividade e competencia”, como o propio Guillermo Fernández Romo, técnico racinguista, aseguraba na rolda de prensa previa á confrontación.

O técnico contará coa baixa segura do sancionado Migue Leal, mentres que a participación de Chema, con unhas molestias musculares na coxa dereita, será dúbida para a contenda.