A espera chega ao seu fin. O Racing Club Ferrol afronta esta fin de semana o inicio dunha nova tempada en Primeira Federación cun equipo que, pouco a pouco, foi collendo forma durante as últimas semanas e que chega á primeira xornada cunha base recoñecible, novos argumentos e a ilusión dun proxecto que comeza a dar os seus primeiros pasos.

A diferenza do ocorrido hai un ano, cando o descenso obrigou a reconstruír practicamente por completo o cadro, desta vez o punto de partida é diferente. Nove futbolistas que xa formaban parte do equipo a pasada tempada continúan no proxecto: Migue Leal, Edgar Pujol, Fabio, Álvaro Juan, César, Saúl García, Álvaro Ramón, Azael García e Lucas Díaz. A eles súmase a experiencia de dous xogadores que coñecen perfectamente o club e que regresaron a Ferrol: David Castro e Jesús Bernal. A continuidade, polo tanto, combínase coa chegada de novos perfís para construír un grupo renovado, pero non completamente novo.

O cadro complétase con Ger Nóvoa, Eric Monjonell, Vicente Esquerdo, Unai Ropero, Endika Buján, Roberto Arroyo, Dani Ojeda, Raúl Alcaina e Seku Djanbou, ademais dos mencionados Castro e Bernal. Futbolistas con traxectorias, idades e características diferentes que permiten a Javi Vázquez dispoñer de alternativas en todas as liñas. Desde a experiencia acumulada por xogadores como Dani Ojeda, cunha longa traxectoria no fútbol profesional, ata futbolistas máis novos como Buján, Arroyo ou Monjonell con moita marxe de crecemento.

Todo isto ponse agora ao servizo dunha nova idea de fútbol. Javi Vázquez e o seu corpo técnico foron construíndo durante a pretempada as bases dun equipo que o propio adestrador quere: intenso, recoñecible, con identidade e con alma. Que se deixe a vida en cada adestramento e en cada partido. Desde aquela primeira sesión de benvida na Malata ata as últimas semanas de preparación, o técnico erixiuse como unha das pezas angulares dun proxecto ilusionante no que cada futbolista asume o seu rol e no que o colectivo está por riba das individualidades.

O resultado é un Racing diferente ao de hai doce meses. Non porque o camiño vaia ser sinxelo —a Primeira Federación volve esixir regularidade, competitividade e capacidade para afrontar momentos de todo tipo—, senón porque o equipo chega ao inicio da competición cunha estrutura máis recoñecible e as ideas moi claras de cal ha de ser a súa identidade. 

A espera remata. Comeza a competición. E con ela, unha nova oportunidade para este Racing.