Sekou Djanbou afronta os seus primeiros días como futbolista do Racing Club Ferrol coa intención de seguir medrando e achegar desde o centro do campo as cualidades que definen o seu xogo. O centrocampista móstrase satisfeito coas súas primeiras sensacións na cidade e co ambiente que atopou dentro do vestiario.

“É un equipo grande e encantoume o proxecto. Asinei aquí para medrar como futbolista”, explica Djanbou cando fala dos motivos que o levaron a aceptar a proposta racinguista.

As súas primeiras semanas permitíronlle coñecer un equipo que, segundo destaca, traballa con moita intensidade e esixencia. “Atopei un equipo que traballa duro, con moita intensidade. Un equipo moi familiar e síntome moi ben aquí”, sinala o futbolista, que tamén pon en valor a acollida dos seus novos compañeiros: “Os meus compañeiros acolléronme moi ben”.

Djanbou ten claro que quere achegar ao conxunto dirixido por Javi Vázquez. Preguntado polas súas principais virtudes, resume o seu compromiso en catro conceptos: “Traballo, enerxía, intensidade e concentración”.

No terreo de xogo, o futbolista defínese como un mediocentro defensivo e un pivote de perfil físico, con especial predisposición para competir nos duelos.