“Quero un equipo con identidade, recoñecible, con alma… que transmita”. Con estas palabras, Javi Vázquez definiu, durante a súa presentación oficial como novo adestrador do Racing Club Ferrol, o modelo de equipo que aspira a construír de cara á próxima tempada.

Nun acto áxil e próximo, o técnico de Madrid estivo acompañado polo presidente do club, Manuel Ansede, e o director deportivo, Álex Vázquez. Na súa primeira comparecencia como racinguista, transmitiu ilusión, ambición e un firme compromiso co proxecto.

Ao longo de máis de media hora, Vázquez abordou diferentes aspectos clave, como a súa traxectoria profesional, a visión do proxecto deportivo, os sinais de identidade do equipo e a importancia dos roles tanto dentro como fóra do terreo de xogo. Todo isto co obxectivo de sentar as bases do novo Racing Club Ferrol.