Os nenos do Centro de Menores de Ferrol viven unha xornada inesquecible co primeiro equipo

Máis de unha vintena de nenos e nenas usuarios do Centro de Menores de Ferrol estiveron presentes onte no adestramento do primeiro equipo, xunto con sete dos seus monitores. Con idades comprendidas entre os 4 e os 12 anos, os pequenos gozaron dunha xornada entretida na que se puideron fotografar cos seus ídolos, falar cos nosos xogadores e levar como recordo unha chea de autógrafos.

A visita, organizada pola Fundación Racing Club Ferrol, forma parte das actividades que anualmente desenvolvemos como parte da nosa estratexia social, a través da cal vertebramos unha notable actividade con todo tipo de entidades e asociacións sen ánimo de lucro da comarca. Un eixe estratéxico fundamental na nosa folla de ruta que abordamos coa responsabilidade de sabérmonos un importante axente social dentro de Ferrolterra, comprometido con mellorar a vida dos habitantes da nosa contorna.