Castilla 237 aposta polo Racing

Nas boas, pero sobre todo nas non tan boas. Con esa mentalidade tan construtiva e positiva desembarcou a promotora residencial Castilla 237 no Racing Club Ferrol. Aínda que a vinculación persoal co club dalgúns dos seus responsables se remonta a varias décadas atrás, a firma decidiu apostar agora como patrocinador, consciente de que "co descenso de categoría, é o mellor momento para apoiar ao club", explicaba Pablo Castro, responsable de vendas da firma. Un respaldo firme ao noso proxecto co propósito de contribuír ao seu crecemento e, con el, ao da cidade. "Queremos achegar o noso gran de area neste momento no que se ve o respaldo de todos os abonados e da cidade", insistía Castro na rolda de prensa de presentación deste patrocinio, que leva asociado, entre os seus activos, un partido patrocinado.

Así, Castilla 237 converterase no primeiro protagonista do encontro neste curso, coincidindo co noso debut ligueiro do domingo, ás 12.00 horas, na Malata. Será só unha das contraprestacións dun acordo que tamén lle reportará á firma visibilidade noutros soportes físicos e dixitais, no estadio e nas nosas RRSS. Entre os primeiros, os flamantes novos marcadores que lucen desde hai unha semana no estadio e sobre os cales se proxectará tamén publicidade de Castilla 237.

"Estamos moi agradecidos por este respaldo que permite que o noso proxecto siga mellorando", explicaba o director de Márketing do Racing Club Ferrol, Daniel Agra, no acto desta mañá, no que fixo fincapé na importancia de contar ao noso lado con empresas que "compartan valores co club como o traballo e o esforzo". Firmas, ademais, locais, que nos arraigan aínda máis á comarca e permiten desenvolver sinerxías beneficiosas para o tecido empresarial e deportivo de Ferrolterra.