Desde o Racing Club Ferrol sabemos que superar os retos que se nos presentan nesta esixente tempada pasa por manter unido o racinguismo, pero, sobre todo, por contar co respaldo de toda Ferrolterra. Asumimos o noso papel como axente social e deportivo da comarca, e queremos implicar a todos os equipos de fútbol locais nos nosos logros.

Queremos velos na Malata. Sentir o seu apoio e enerxía. Celebrar con eles cada logro. Pero tamén queremos agradecer, con este xesto, o seu traballo diario, o seu esforzo e dedicación para que centos de nenos e nenas gocen do deporte que tanto aman.

Por iso, esta tempada, da man da Fundación Racing Club Ferrol, imos recuperar unha iniciativa xa desenvolvida en tempadas anteriores. A través dela, en cada xornada que disputemos como locais, xogadores e adestradores dos distintos clubs da comarca acompañarannos no estadio da Malata. Ademais, os presidentes das entidades serán convidados ao palco de honra para gozar do encontro.

De forma gradual, todos eles irán pasando polas nosas bancadas, comezando polos integrantes da SRD Canido e o CD Libunca, que o domingo nos alentaran no partido ante a SD Ponferradina.