A Malata volve ser o punto de partida. O Racing Club Ferrol recibe mañá, sábado, ás 16.30 horas, á SD Ponferradina na décima xornada do Grupo 1 de Primeira Federación, coa intención de recuperar o camiño da vitoria tras o tropezo da pasada semana.

O 2-0 en Anduva cortou unha serie de tres triunfos consecutivos, pero non a progresión do equipo, ao que o técnico Javi Vázquez segue vendo en liña ascendente: “Eu o que quero é que sexamos mellores no proceso, que vaiamos dominando cada vez máis cousas que nos acheguen á vitoria”, resumía na previa do encontro de mañá. E, nese sentido, está moi tranquilo: “Sexa cal sexa o resultado, o meu obxectivo é que compitamos os 90 minutos coa nosa idea e non nos desordenemos”, insistía o preparador.

A pesar dese último tropezo, o Racing mantense terceiro con 16 puntos e regresa a un escenario onde aínda non coñece outro resultado que a vitoria.

Dous de dous. Real Unión, Barakaldo, Pontevedra e Unionistas pasaron por A Malata e ningún levou puntos. É o mellor argumento co que o equipo afronta un partido que abre, ademais, dúas xornadas consecutivas como local, xa que o Racing recibirá despois á UD Logroñés.

Potentes na casa, si, pero moi conscientes tamén de que os éxitos chegarán só se o equipo se mantén fiel a si mesmo ante un rival hipercompetitivo como a SD Ponferradina, e para o que só hai boas palabras desde o club verde: “Somos dous equipos moi competitivos. Nós queremos ser os que levemos o peso e facer que, coa nosa identidade, se xogue ao que nós queremos”, aseguraba o técnico, que para este encontro contará coas baixas de Migue Leal e Álvaro Juan, ambos avanzando moi positivamente na súa recuperación física.

En fronte estará unha Ponferradina que dirixe Mehdi Nafti e que suma 13 puntos, tres menos que o Racing. Os seus números debuxan un dos equipos máis axustados do grupo, con seis goles a favor e seis en contra en nove xornadas. O conxunto berciano chega tras empatar sen goles ante o Barakaldo e encadea tres partidos de liga sen gañar. Entre semana superou nos penaltis ao UD Llanera na primeira rolda da Copa do Rei. Para o duelo de mañá non poderá contar con Fede San Emeterio, un dos seus fixos no centro do campo, que cumpre ciclo por acumulación de amonestacións.

Para a contenda, o Racing garda un as na manga: o empuxe que terá dos seus desde as bancadas de A Malata. Nun horario vespertino máis atractivo e tras a boa sintonía e comuñón que se está xestando coa afección, o apoio dos seguidores verdes será vital.

Afectacións

As obras da cuberta de A Malata continúan a bo ritmo. A bancada de Preferencia está xa cuberta e na de Tribuna avánzase na colocación da estrutura metálica que sosterá o teito.

Con todo, seguirá pechado o sector N de Preferencia, polo que solicitamos aos abonados alí situados que se trasladen ao sector K, ocupando neste a mesma fila e asento que de costume. Desde o club lamentamos estes inconvenientes, que confiamos en que poidan solucionarse nas próximas semanas.