O noso legado

Escribiron unha das páxinas máis gloriosas da historia actual do club. No 25.º aniversario daquela fazaña, non podiamos deixar pasar a ocasión de render unha homenaxe aos compoñentes do equipo que, na tempada 1999/00, nos levaron ao fútbol profesional e a toda unha xeración de racinguistas que mantivo o legado e o espírito nos anos escuros.

Grazas a todos eles por facer posible aquel soño e, en especial, a Alberto Pérez, Pazolo, Pablo Rodríguez, Gontxal Sueiro, Manu, Miranda, Manel e David Pérez por axudarnos a contar a súa historia, que é a nosa.

Foi un pracer reencontrarnos con Alberto, o xogador que máis veces vestiu a camisola deste club (máis de 400 ocasións); Pazolo, unha institución para a entidade, terceiro máximo goleador histórico e artífice do último gol no Inferniño e o primeiro en A Malata; Pablo Rodríguez, sempre nos nosos corazóns pola súa garra, a súa autenticidade e por ese penalti que nos fixo tocar a gloria; Sueiro, que veu para quedar, para ser un ferrolán máis, para regalarnos un gol imposible que nos deu vida aquela tarde; Manu e Manel, santo e seña do racinguismo, os que vestiron a camisola desde o berce, os que sempre estiveron e os que sempre están; e, por suposto, David Pérez, con quen corrimos a banda centos de veces aquela tempada e que agora volveu, quen sabe se para logralo de novo.