Á espera de que a Real Federación Española de Fútbol confirme de maneira oficial o inicio ligueiro en Primeira Federación —previsto para a última fin de semana de agosto—, o Racing Club Ferrol xa perfila os detalles dunha pretempada que marcará os primeiros pasos do noso novo proxecto.

O conxunto dirixido por Javier Vázquez arrancará o próximo mércores 16 de xullo, data na que está prevista a primeira sesión de traballo. Durante esas xornadas iniciais, o plantel combinará os adestramentos sobre o céspede cos habituais recoñecementos médicos e probas físicas.

Por diante, algo máis de seis semanas de preparación nas que o técnico madrileño buscará afinar o equipo de cara ao estreo ligueiro. Para iso, celebraranse varios partidos de preparación, algúns dos cales xa están oficialmente pechados.

Ese calendario de amigables arrancará o 1 de agosto coa visita ao Villalonga FC, no campo de San Pedro, e continuará o día 5 co enfrontamento ante o Bergantiños FC en O Pote. O xa tradicional partido ante o Real Madrid Castilla en Viveiro, previsto para o 8 de agosto, permitirá ao equipo alcanzar o ecuador da súa preparación.

Calendario de partidos confirmados

Villalonga FC – Racing Club Ferrol
Sábado 1 de agosto | Campo de San Pedro (Vilalonga)

Racing Club Ferrol – Bergantiños FC
Mércores 5 de agosto | Campo de O Pote (Maniños)

Real Madrid Castilla – Racing Club Ferrol
Sábado 8 de agosto | Campo de Cantarrana (Viveiro)