Ilusionado co proxecto e con moitas ganas de que comece xa a tempada, Ger Nóvoa estreouse onte como xogador racinguista nun acto de presentación no que estivo acompañado polo presidente do club, Manuel Ansede. O mandatario deu a benvida ao central galego e destacou que a súa incorporación responde á aposta da entidade por un proxecto ambicioso, con identidade propia e sustentado en futbolistas comprometidos cos valores do Racing.

Durante a súa intervención, Ansede definiu a Ger como un xogador fiable, intenso e con capacidade para marcar diferenzas, poñendo en valor tanto o seu rendemento deportivo como a súa forma de entender o fútbol. Ademais, subliñou a satisfacción que supón para o club incorporar a un futbolista galego que encaixa plenamente na idea de equipo que o Racing quere seguir construíndo.

Tras recibir a benvida do presidente, Ger Nóvoa explicou que a súa chegada ao Racing "foi unha decisión fácil de tomar. Quería volver a Galicia e, ademais, o proxecto chamábame moito", asegurando sentirse plenamente integrado tanto no club como na cidade desde os seus primeiros días en Ferrol.

O defensa destacou o bo ambiente que se respira no vestiario e a intensidade coa que o plantel está afrontando a pretempada. "Estame encantando a dinámica dos adestramentos, os futbolistas que hai e a xente nova que vén con ganas e ilusión", afirmou, antes de eloxiar o traballo de Javi Vázquez e recoñecer as ganas do grupo por comezar a competir. "Os adestramentos están ben, pero o que lle gusta ao xogador é xogar. Temos ganas de ver o equipo e ver como nos compenetramos."