O adestrador conta no seu corpo técnico con xente de confianza, pero tamén con membros do antigo persoal.
O Racing Club Ferrol xa completou o corpo técnico que acompañará a Javi Vázquez á fronte do primeiro equipo durante a tempada 2026/27.
O seu equipo de traballo estará integrado por perfis de confianza cos que o adestrador racinguista compartiu experiencias profesionais en etapas anteriores. Carlos Díaz Maño exercerá como segundo adestrador e será o principal apoio de Javi Vázquez no banco. Xunto a el incorpóranse tamén o preparador físico Javi Cieza e o analista táctico Christian Parra. A este grupo sumarase Fernando Currás, que asumirá a preparación específica dos porteiros.
Moitas caras novas, pero tamén outras que dan continuidade ao traballo dos últimos anos, como é o caso de Fer López, que seguirá exercendo labores de readaptador; e de Miguel Gallego, que continuará vinculado ao departamento de preparación física.
Con estas incorporacións, o Racing Club Ferrol continúa consolidando unha estrutura técnica multidisciplinar que permita afrontar coas máximas garantías os retos da nova campaña, optimizando o rendemento diario do equipo.