Comezamos a liga o último fin de semana de agosto en A Malata ante o CF Talavera de la Reina
A última xornada da competición regular disputarémola fóra contra o Unionistas de Salamanca.
Nun evento celebrado na localidade abulense de San Juan de la Nava, a RFEF deu a coñecer os calendarios de todas as súas competicións, entre elas, o de 1ª RFEF, no cal Grupo 1 militará o Racing Club Ferrol a próxima tempada.
A competición arrincará para nós en A Malata o último fin de semana de agosto, co Club de Fútbol Talavera como primeiro rival.
Nunha tempada con seis equipos galegos en liza, acumularanse os derbis. O primeiro deles chegará para o Racing na xornada 4, o 21 de setembro, coa súa visita ao Anxo Carro para medirse ao CD Lugo. Salvo a visita do Ourense CF a A Malata, durante toda a primeira volta, o cadro verde disputará todos os seus partidos de rivalidade a domicilio. Así, medirase ao Celta Fortuna a finais de outubro, ao CD Arenteiro en novembro e ao Pontevedra CF o 4 de xaneiro, no primeiro partido de 2026.
Para a segunda volta só quedará un derbi a domicilio, o do Ourense CF, programado para o mes de marzo. Polo contrario, visitarán A Malata, sucesivamente, o CD Arenteiro (xaneiro), CD Lugo e Celta Fortuna (febreiro) e Pontevedra CF (maio).
Pensando nos nosos afeccionados e neses desprazamentos que, por cercanía, adoitan ser atractivos para eles, marcamos en vermello no noso calendario as visitas ao estadio Román Suárez Puerta de Avilés, no partido previo ao parón nadaleiro da competición, previsto para o 21 de decembro; e ao Toralín, para medirnos á SD Ponferradina o 18 de xaneiro.
A liga regular prolongarase ata o fin de semana do 23 e 24 de maio. Neste caso, tocaranos despedir o campionato ante o Unionistas de Salamanca a domicilio.
Despois chegará o tempo de play-off, que se prolongará ata o 21 de xuño.