César Fernández, primeira fichaxe para a nosa portería
O futbolista formouse na canteira do RC Celta e chega respaldado por unhas moi boas condicións e gran proxección.
Un gran xogo cos pés, moi rápido e áxil. Esa é a carta de presentación coa que César Fernández (O Barco de Valdeorras, 2004) chega ao Racing Club Ferrol para converterse no primeiro dos porteiro cos que este ano contará a nosa plantilla.
Un porteiro sub-23 con ADN de A Madroa, que desenvolveu toda a súa carreira na canteira celeste, así como nos seus filiais Celta Fortuna e Gran Peña, e que agora recalca no Racing para afianzar a súa proxección. Chegou a estar convocado en nove partidos polo Celta en Primeira División, aínda que non chegou a debutar.
César Fernández conta, ademais, con equipaxe internacional, pois pasou por varias seleccións nacionais de categorías inferiores. De feito, disputou catro partidos amigables co conxunto español U19, así como cinco encontros clasificatorios para o Europeo U19 e un encontro dos Xogos do Mediterráneo.
Benvido, César. Non se nos ocorre un sitio mellor para que sigas crecendo que o noso Racing.