A tempada 2026/27 arrancará para o Racing a última fin de semana de agosto, visitando o campo de Fadura para enfrontarse ao Arenas Club.

Así o determinou o sorteo do calendario que rexerá a próxima tempada no Grupo 1 de Primeira Federación, no que militará o cadro verde. Un evento que se celebrou esta mesma tarde na Praza da Selección en Madrid.

O equipo que dirixe Javi Vázquez disputará as dúas primeiras xornadas a domicilio, polo que haberá que agardar ata a terceira cita ligueira -o segundo fin de semana de setembro- para asistir ao debut racinguista en A Malata. Será ante o Real Unión Club.

Con cinco equipos galegos en competición, haberá unha chea de derbis esta campaña. O primeiro deles chegará para o Racing na xornada 5, a finais de setembro, coa visita ao Anxo Carro para enfrontarnos ao CD Lugo. Será unha etapa de campionato intensa, porque de forma consecutiva recibiremos na Malata ao Pontevedra CF e visitaremos ao Fabril. O último derbi desta primeira volta levaranos, a finais de novembro, a Ourense.

Na segunda volta, xaneiro depararanos a visita do Fabril. UD Ourense e Pontevedra CF, na Malata e Pasarón, serán os nosos rivais en febreiro para rematar a rolda de partidos de rivalidade en abril recibindo ao CD Lugo.

Á marxe destes encontros de máxima rivalidade, a tempada deparará desprazamentos atractivos para os nosos afeccionados, que, xa sexa por proximidade ou entidade dos seus adversarios, marcarán en vermello encontros como a visita á Cultural Leonesa o primeiro fin de semana de decembro ou á Ponferradina a finais de xaneiro. 

A liga regular prolongarase ata o 23 de maio, no que despediremos o campionato enfrontándonos no Ruta de la Plata ao Zamora CF.

A continuación, chegará o momento de dirimir os play-off de ascenso, cuxas eliminatorias se prolongarán ata o 20 de xuño.