Pablo López ocupará o banco do Racing na próxima tempada

Pablo López Vidal (A Coruña, 1977) dirixirá ao Racing Club Ferrol a próxima tempada. O adestrador herculino, que será presentado mañá, chega acompañado por David Pérez como asistente, por Roberto Valeiro, que exercerá de adestrador de porteiro, e por Kiko Corredoira, como preparador físico.

O técnico coñece á perfección a entidade, da que formou parte dende xullo de 2020 ata o pasado mes de novembro. Nese tempo, formou parte dos equipos de traballo de Emilio Larraz e Cristóbal Parralo. Nas dúas últimas tempadas, e ata que fichou polo Ourense CF, Pablo López desempeñou traballos de scouting como adxunto á dirección deportiva do club.

Pablo López é un experto coñecedor do fútbol galego e nacional. Iniciouse nos bancos en 2015, tras poñer fin á súa carreira como xogador no CD As Pontes. No club pontés arrincou a súa etapa como adestrador, dirixindo ao equipo xuvenil e posteriormente ao primeiro equipo. En 2016, incorporouse ao Deportivo da Coruña como adestrador do Xuvenil B, e en 2018 ascendeu ao primeiro equipo como asistente de Clarence Seedorf.

A súa colaboración con Seedorf continuou na selección nacional de Camerún, onde foi segundo entre 2018 e 2019. Tras a súa etapa en Ferrol, en novembro de 2024, asumiu o cargo de adestrador do Ourense CF, onde logrou unha notable mellora no rendemento do equipo, que ratificou a permanencia en 1ª RFEF.

López distínguese polo seu enfoque táctico detallado e pola súa habilidade para adaptarse ás fortalezas dos seus xogadores, así como por realizar un análise exhaustivo dos datos.

Agradecemento

Dende o Racing Club Ferrol queremos agradecer profundamente ao técnico Alejandro Menéndez, quen estivo ao fronte do equipo nos últimos meses, o seu esforzo e entrega nos duros momentos deportivos que vivimos esta tempada. Aínda que o obxectivo non se alcanzase, o seu traballo e o do seu segundo, Carlos Pérez Salvachúa, foi impecable.

Un agradecemento que facemos extensible tamén a César Caamaño e Luis Rodríguez Fandiño, quen nas dúas últimas tempadas foron pezas fundamentais do noso corpo técnico dende os seus postos de adestrador de porteiro e preparador físico. Extinguida a súa vinculación coa entidade, a todos eles desexámoslles a mellor das sortes nos seus próximos retos profesionais.