Segundo partido da tempada e novo compromiso a domicilio para o Racing, que se mide o domingo -18.30 horas-, no Francisco de la Hera, ao CD Extremadura co obxectivo de sumar a primeira vitoria do curso.

O estreo en Fadura deixou un punto para o conxunto racinguista despois dun encontro no que o equipo amosou diferentes rexistros, soubo adaptarse ás esixencias do partido e chegou a poñerse por diante, aínda que o Arenas Club logrou igualar no tramo final.

Agora, o Racing afronta unha nova proba lonxe de A Malata ante un rival que tamén busca os seus primeiros puntos da tempada. Un recentemente ascendido que deu continuidade ao proxecto que o converteu a pasada campaña en campión do seu grupo de Segunda Federación e que no seu debut ante o Logroñés amosou boas bases a pesar do seu tropezo. O exracinguista Kike Márquez comanda un plantel con outros xogadores de pasado verde como Rober Correa.

Na previa do encontro, Javi Vázquez tivo palabras de eloxio para o seu adversario, poñendo o foco no bo rendemento que están amosando neste inicio de campionato os equipos que manteñen unha liña continuísta respecto á pasada tempada.

Respecto aos seus pupilos, e tras poñer en valor o bo traballo que o equipo realizou esta semana, confiou en que os erros que se cometeron en Fadura servisen para «medrar» e concretou esa mellora en dous aspectos: «Temos que ser máis dominadores co balón e volver defender moi ben, pero non tanto tempo».

Un dos aspectos sobre os que insistiu nos últimos días é na xestión dos últimos minutos de partido, neses momentos nos que «se vas gañando, o rival fai cousas distintas e nós temos que saber como minimizalas».

Convocatoria

Os lesionados Unai Ropero e Álvaro Juan son as únicas baixas coas que Javi Vázquez contará para o partido, no que a gran novidade da convocatoria é a presenza de Etienne Eto'o e Raúl Blanco, os dous últimos xogadores incorporados esta mesma semana no peche do mercado de fichaxes. David Osei completa a convocatoria.