Fabio reforza o mediocampo do Racing

O Racing Club Ferrol chegou a un acordo con Fabio González (Ingenio, Gran Canaria, 12 de febreiro de 1997) para que o mediocentro canario vista a camiseta verde ata final de tempada. O futbolista leva xa varios días adestrando ás órdenes de Guillermo Fernández Romo, polo que está á disposición do técnico.

Pivote organizador con unha gran visión de xogo e intelixencia táctica, Fabio pode asumir o control do ritmo do partido desde a medular. Ademais, ten capacidade para xerar xogo ofensivo, conectar liñas e aportar equilibrio ao centro do campo.

Agás por un breve paso de cinco meses polo CD Tenerife na última metade da pasada tempada, Fabio González desenvolveu o groso da súa carreira profesional na UD Las Palmas, club no que se formou como futbolista. Debutou no primeiro equipo do conxunto insular na campaña 2017/18, aínda como xogador de Las Palmas Atlético, consolidándose de forma definitiva a partir da 2019/20. Ao longo de dez tempadas cos canarións, acumulou 9 partidos en Primeira División e 110 en Segunda, con máis de 6.567 minutos.

Esa notable experiencia no fútbol profesional e a súa capacidade para aportar liderado desde o xogo foron determinantes á hora de decantar a súa contratación.