O ferrolán Álex González (2004) incorpórase á disciplina do club para continuar co seu desenvolvemento deportivo esta tempada nas filas da UD Somozas.

O lateral esquerdo procede do Deportivo Aragón —filial do Real Zaragoza—, ao que chegou procedente do Gran Peña e tras pasar polas canteiras do Racing Club Ferrol, Real Club Deportivo e Real Club Celta.

A súa notable traxectoria en categorías de formación fala dun futbolista de calidade que, tras dúas tempadas lastrado polas lesións, demostrou nas últimas semanas, nas que estivo realizando a pretempada ás órdenes de Javi Vázquez, que está de novo a pleno rendemento. Neste período, ademais, deixou patente as súas magníficas condicións e marxe de desenvolvemento deportivo, o que lle permitiu entrar de novo no radar racinguista.

Lateral esquerdo de perfil ofensivo, González destaca pola súa capacidade para incorporarse ao ataque e ofrecer profundidade desde a banda, ao tempo que conta con percorrido para seguir medrando no aspecto competitivo.

A súa incorporación enmárcase no acordo de colaboración entre o Racing Club Ferrol e a UD Somozas, que permitirá ao futbolista traballar co primeiro equipo, pero dispoñer dun escenario competitivo no que continuar a súa evolución durante a tempada 2026/27.

Coa chegada de Álex González, o Racing incorpora xuventude, experiencia e marxe de crecemento, mentres que a UD Somozas suma un futbolista que contribuirá a darlle un salto de calidade, ademais dun perfil altamente competitivo.

Benvido, Álex!