Celebramos o Día Internacional das Persoas con Discapacidade en O Pote

Con motivo do Día Internacional das Persoas con Discapacidade, esta mañá recibimos no campo de O Pote, en Maniños, a preto de dúascentas persoas procedentes de distintas asociacións e centros educativos da nosa comarca. Convidados pola Fundación Racing Club Ferrol, usuarios e profesionais de Virxe do Chamorro, Centro Ocupacional Souto de Leixa, CEE Terra de Ferrol, Cogami Ferrol, Aspromor Ortigueira, Aspanaes Ferrol, Aspaneps Fene, Saúde Mental Ferrol Centro Ocupacional APADER e Centro Ocupacional Terra Cha Vilalba compartiron con nós unha intensa e fermosa xornada de convivencia arredor do adestramento do primeiro equipo. Entre eles, ademais, puidemos saudar a varios integrantes do noso equipo Genuine, que gozaron especialmente da experiencia.

Ao longo da mañá, os asistentes seguiron de preto o traballo dos xogadores, coñeceron parte da súa rutina diaria e viviron momentos máis persoais con eles. Tras a sesión, o plantel dedicou un bo anaco a conversar, asinar autógrafos e facerse fotografías con todos os asistentes.

Desde o Racing Club Ferrol queremos expresar o noso sincero agradecemento a todas as entidades participantes, así como aos seus usuarios, familias e profesionais. A súa visita de hoxe volve recordarnos que o fútbol é tamén un espazo de encontro, de inclusión e de recoñecemento para todas as persoas.

Nunha data tan sinalada, renovar o noso compromiso cos valores de solidariedade, igualdade e respecto é para nós motivo de orgullo.

Seguiremos traballando para impulsar iniciativas que acheguen o deporte a toda a comunidade, convencidos de que o fútbol pode ser —e debe ser— un camiño para a unión, a esperanza e a visibilidade.