O COLEXIADO, OS PENALTIS E O CERCEDA AVISO IMPORTANTE PARA O RACING

O colexiado ourensán Álvarez Prada, con 7 cartóns amarelos ao Racing na 1ª parte, e un penalti que tan só viu el no min. 18, condicionou un partido entre dous dos aspirantes a estar na zona alta da táboa. Os primeiros compases do encontro facían presaguiar un duelo moi apaixonante e competido, no que ambos equipos buscaban a portería contraria, o equipo local cun xogo combinativo e o Cerceda cunhas perigosas contras. Con todo, o gol chegaría nunha pena máxima que o colexiado sacouse da manga no min. 18 e que Manu Barreiro transformaba para pór o marcador no 0-1. O Racing non se desfixo e seguiu acosando a portería rival pero nunha nova contra visitante, o árbitro sinala un novo penalti, xogábase o min. 28 pero esta vez Cabrejo lanzou o balón fóra. O Racing puido empatar, primeiro cunha ocasión de socato de Marcos Suárez e no min. 44 cun disparo de Pablo Rey pero o balón foi repelido polo traveseiro, chegándose ao descanso co 0-1 no marcador. Na segunda parte, Luisito deu entrada a Marcos Álvarez e Sergio Arias e o conxunto verde acurralou ao Cerceda no seu campo aínda que sen dispor de ocasións claras de gol e no min. 65 os ferroláns quedaron cun home menos pola expulsión de Antonio con dobre cartolina amarela. A partir destes momentos o partido abriuse e o Cerceda volveu contraatacar con certo perigo, aínda que o Racing dispuxo de dúas ocasións moi claras para bater ao gardameta visitante, unha de Felipe e outra de Aira que non se materializaron por verdadeira mala sorte. E aínda por riba, no min. 82 unha nova pena máxima, nesta ocasión de Rafa Casanova que ao recibir un empuxón desequilíbrase e como consecuencia toca o balón coa man co que o colexiado decretou o penalti co que Barreal establecía o 0-2 definitivo. Nos últimos minutos acoso infrutuoso do Racing que con esta derrota recibe un aviso importante do que é a 3ª División.